الاقتصاد اليوم ـ خاص:

رح حاكيكم... اليوم صارت مفاصلنا تطقطق.. وضهري يوجعني.. فقلت لحالي بحمل حمالي وبروح على شي صيديلي وبنقلو وجعنا عسى يسفقنا شي حبة برتاح عليها.. لانو ولله مو حمل كشفية دكتور ودوا سيد راسي.. واحدة من التنين..غير هيك ما بتحمل الميزانية.. لانو صارت مكسورة وتحت الصفر ..

المهم سيد راسي.. رحنا عالصيديلي.. قلي ياعمو ما بيمشي الحال بدك دكتور وتحليل ووووو.. لك طلعت مغبون من عندو.. شو دكتور وتحاليل سيد راسي.. كلها وجع ركب وضهر.. وشوية طقطقة بدها كل هي البلشة سيد راسي...؟

ما علينا سيد راسي.. رحنا عالدكتور قلنالو قصتنا.. سألني كم بيضة بتاكل باليوم؟!!!... حسيتو عم يمزح .. قلتلو... دكتور سؤالك كم بيضة باليوم ولا بالشهر؟!.. اذا حق البيضة ٣٥٠ ليرة سيد راسي..واذا بدنا ناكل ٦ بيضات يوميا لالي وللعيال صار المجموع 2100 ليرة سيد راسي يوميا.. يعني شهريا 63 الف ليرة سيد راسي... فمشان هيك وضعنا خطة تقشف للبيض وصرنا ناكلو للبيض بالمناسبات السعيدة والأعياد...

سكت الدكتور... بس رجع سالني.. بتشرب حليب يا ابو نجيب؟.. كمان حسيتو عم يمزح .. قلتلو اي وحصرا نيدو!... لك شو حليب يادكتور.. لك ما عدنا شمينا رحيتو.. لك اللبنة والجبنة صرنا نشتريه بنص وقية.. لك وين عايش دكتور.. مو دريان انو سعر كيلو اللبنة صار 7000 ليرة..! والجبنة الشلل 16 الف ليرة!...

قلي الدكتور.. ابو نجيب معك نقص كالسيوم ولازم تتغذى.. قلتلو للدكتور.. غريب ولله .. معقول نقص كالسيوم.. بالرغم عم اشرب مي كلها كلس وكل يوم... فكيف هيك سيد راسي وين عم يروح الكلس يلي بمياه الشرب... ليكون مغشوش كمان سيد راسي؟

الدكتور كتبلي على كم دوا.. طبعا بعد ما اخد كشفية تتكون من رقم وبجانبه 3 اصفار.. خلاني صفرن عليه... قلت لحالي ولله لو اشتريت بحق الكشفية كم بيضة مو احسن..

قال نقص كالسيوم قال سيد راسي... لك صار معنا نقص حديد وكالسيوم ورمل وبحص... بيفرجها ربك سيد راسي
الاقتصاد اليوم ـ خاص: